Nachdem ich dä Lea au no Fernie zeigt han, hät sie leider wiedr zrug id Schwiz müssä. Ich han sie uf Calgary an Flughafe bracht und bin losgfahre richtig oschtä. Dur d Provinzä Alberta, Saskatchewan und Manitoba isch äs relativ seeehhhr flach gsi....alles Prärie und viel Farmland.
Gschlafä hani meischtens i mim supär Van. Ussärd Z Manitoba, det hani chönä bi dä Schwiegereltärä vo dä Mary (vo Fernie) übernachte.
Ich bin froh gsi woni Ontario erreicht han, und s widär chli meh Bäum und Seeä umägha hät. (ziemli grossi Seeä sogar...).
In Thunder Bay am Lake Superior bini no im Provincal Park uf äm "Sleeping giant" gsi, da isch ä Halbinslä wo vom Feschtland usgseht als würd än Gigant im Wasser ligä.
Isch voll schön gsi....
Uf äm Lake Huron hani zwei Täg uf Manitoulin, dä gröschtä Süässwasser Inslä vo dä Wält verbracht...au das isch hammer schön gsi, voll s vertroimtä Insäli mit schönä Sandstränd.
Vo Manitoulin hani d Fähre gno Feschtland zrug und bin uf Hamilton gfahre.
Da bini ez au scho widr sit zwei wuchä WEC Homebase und han ä supär ziit. Hilfä gärtnerä, malä, und alles parat machä für d Konforänz wo nächscht Wuchä afangt.
Natürlich bini au scho go sehenswürdigkeitä aluägä, letscht Wuchä bini d Niagara Fäll (Boaah) go aluägä u hüt bin z Toronto gsi.
